Nautalund frá Hvammi – Ölnaut

Lýsing

Fyrsta flokks ungnautakjöt frá Hvammi í Ölfusi. Nautalundir eru mýksti vöðvi skepnunnar og sómir sér best í sælkeraveislum. Íslenskt gæðanaut!

Ágætt er að miða við 200-250 g á mann í aðalmáltíð.

Kílóverð: 11.990 kr.

Frystivara.

Nautin í Hvammi í Ölfusi eru engin smásmíði. Þau fá gott atlæti og eru í rúmgóðum stíum. Mynd / Hvammsbúið

Bændurnir

Í Hvammi búa bændurnir Pétur Benedikt Guðmundsson og Charlotte Clausen. Sonur þeirra Davíð Clausen starfar í kjötiðnaði og sér um nautaeldið.

Nautin í Hvammi eru alin í rúmgóðum stíum og fá bjórhrat ásamt íslensku heyi alla sína ævi. Þess vegna kalla bændurnir þau „Ölnaut“. Síðustu þrjá mánuðina fyrir slátrun fá nautin alvöru bjór sem hjálpar til við að fita þau. Bjórinn kemur úr bjórverksmiðju og er ekki almenn söluvara. Hvert naut fær á bilinu 1-2 lítra af bjór á dag en hann er blandaður byggi sem ræktað er á bænum.

Næringarinnihald

M.v. 100 grömm af fitusnyrtri nautalund:
Orka: 562 kJ, 134 kcal.
Próten: 20,0 g
Fita: 6 g, þ.a. mettaðar fitusýrur 2,8 g og ómettaðar 2,2
Kólestról: 59 mg
Kolvetni: 0

Hvernig er best að elda nautalund?

Það er ýmist hægt að heilsteikja nautalund eða hluta hana í steikur. Skerið kjötið í þá þykkt af sneiðum sem henta þínum smekk.

Gefið ykkur góðan tíma til að afþíða kjötið í kæli ef það hefur verið frosið. Mikilvægt er að taka lundina út úr kæli a.m.k. hálftíma áður en eldamennskan hefst og hafa kjötið við stofuhita.

Einföld aðferð við að elda lund í heilu er að hefja steikingu á mjög heitri pönnu, loka kjötinu með því að steikja upp úr smjöri og olíu. Bakið síðan í ofni við 180°C þar til kjarnhiti nær 53-55°C. Látið kjötið hvíla við stofuhita í 10 mínútur áður en það er skorið í sneiðar.

Ef pönnusteikt þá er gott að hita pönnuna upp í meðalhita. Berið lítilsháttar olíu á steikina og saltið og piprið eftir smekk. Hækkið þá hitann á pönnunni og skellið steikinni á ásamt vænni smjörklípu. Snúið steikinni þegar hún er orðin vel brúnuð. Mælt er með því að nota kjöthitamæli og hætta þegar hann sýnir 52°C fyrir medium-rare. Hvílið steikina í 5-7 mínútur eftir eldun áður en hún er borin fram.

Við grillun er fylgt sömu ráðum en mikilvægt að nota kjöthitamæli til að fylgjast með hitastiginu. Munið að steikin heldur áfram að eldast í hvíldinni og því ráðlegt að hætta grillun aðeins áður en æskilegu kjarnhitastigi er náð.

Æ fleiri nota sous vide aðferð við eldun á nautalund. Þá er kjötið eldað í vatnsheldum poka í vatni við nákvæmlega það hitastig sem óskað er eftir að steikin endi í (sjá upplýsingar um kjarnhita hér undir). Eftir að réttu hitastigi er náð er steikin brúnuð á snarpheitri pönnu með smjöri og olíu.

Kjarnhiti nautakjöts

Lítið steikt / 52-55°
Lítið miðlungs / 55-60°
Miðlungs / 60-65°
Miðlungs mikið / 65-69°
Mikið steikt / 71-75°

Aðrar upplýsingar

Kjötið frá Hvammi er unnið og pakkað hjá Ferskum kjötvörum í Síðumúla í Reykjavík.

Frystivara.

Innihald: Ungnautakjöt – lund
Upprunaland: Ísland
Slátrað og unnið á Íslandi.
Alið í Hvammi í Ölfusi
Framleiðandi: Ferskar kjötvörur ehf.
Sláturhús: SS á Selfossi
Söluaðili: Matfélagið ehf. – Matland.is