Strandveiðimenn fá auknar heimildir til veiða

Strandveiðisjómenn fá að veiða meira í ár en í fyrra nú þegar fjórtánda strandveiðisumarið er handan við hornið. Alls verða nú 10.000 tonn af þorski í strand­veiðipott­in­um á þessu tíma­bili, þar af 1.500 tonn sem skiluðu sér af skiptimörkuðum á útmánuðum og matvælaráðherra ákvað að bæta í strandveiðipottinn. Hlutfall strandveiða af leyfilegum heildarafla þorsks nemur nú 4,5% og hefur aldrei svo stórum hluta aflans áður verið úthlutað til strandveiða.

Svandís Svavarsdóttir matvælaráðherra undirritaði nýja reglugerð um strandveiðar á dögunum en með henni er ætlunin að festa strandveiðar enn ­betur í ­sessi, segir á vef ráðuneytisins. „Í dag fá margar fjöl­skyldur hluta sinna heimilistekna frá strandveiðum. Sá afli sem­ er til ráðstöf­un­ar fyrir strandveiðar hverju sinni miðast við ráðgjöf Haf­rann­sókna­stofn­unar og ákvörðun ráðherra um ­leyfi­legan ­heild­arafla.”

„Ég hef fengið fjölda erinda frá strandveiðimönnum þar sem ég hef verið hvött til að taka til skoðunar hvernig bæta megi kerfið þannig að verðmæta­sköp­un verði sem mest og jafn­ræði landsvæða sem best. Þessa hvatningu tek ég alvarlega og og hef ég sett slíka vinnu af stað. Mik­il­vægt er að strand­veiðar verði áfram tryggðar í þágu byggða, sjálf­bærni og fæðuör­yggis­,“ segir Svandís Svavarsdóttir, matvælaráðherra, í tilkynningu frá ráðuneytinu.

Strandveiðar eru stundaðar frá maí til ág­úst ár hvert. Grunnhugsunin að baki strand­veiðum er að stunda megi veiðar með strönd­inni á sjálf­bær­an og ábyrg­an hátt en jafnframt opna möguleika fyrir þau sem ekki hafa yfir aflamarki að ráða á að reyna fyr­ir sér í sjáv­ar­út­vegi.