Deila þessari síðu

Í kjölfarið á kórónuveirufaraldrinum settu stjórnvöld fjármuni í verkefni sem hlaut nafnið „Saman í sókn“. Markmiðið var að útbúa markaðsefni fyrir ferðaþjónustuna til að ná viðspyrnu eftir mögur ár vegna faraldursins. Nú hafa yfirvöld framlengt átakið um eitt ár og gert samning við Íslandsstofu um 550 milljónir króna viðbótarframlag til verkefnisins.

„Ísland saman í sókn fór vel af stað, vakti mikla og verðskulda athygli og skilaði góðum árangri. Í ljósi þess að faraldurinn hefur dregist töluvert á langinn er nauðsynlegt að halda verkefninu áfram og byggja þannig undir nauðsynlega viðspyrnu ferðaþjónustunnar á árinu 2022,“ sagði Lilja Dögg Alfreðsdóttir, ferðamálaráðherra, þegar hún undirritaði samkomulagið við Íslandsstofu á dögunum.

Viðhöldum samkeppnisstöðu Íslands

Tilgangur verkefnisins er að styrkja ímynd Íslands sem áfangastaðar, auka eftirspurn og viðhalda samkeppnisstöðu íslenskrar ferðaþjónustu og annarra útflutningsgreina. Verkefnið er unnið í samræmi við framtíðarsýn og leiðarljós íslenskrar ferðaþjónustu til 2030 sem ber yfirskriftina „Leiðandi í sjálfbærri þróun“ og langtímastefnu stjórnvalda og atvinnulífs fyrir íslenskan útflutning.

Pétur Þ. Óskarsson, framkvæmdastjóri Íslandsstofu, Lilja Dögg Alfreðsdóttir, ferðamálaráðherra og Bjarnheiður Hallsdóttir, formaður Samtaka ferðaþjónustunnar þegar samningurinn um „Ísland saman í sókn“ var framlengdur um eitt ár.
*Myndir / Íslandsstofa*

Langhlaup segir framkvæmdastjóri Íslandsstofu

„Í gegnum faraldurinn hefur tekist að viðhalda miklum áhuga á ferðalögum til Íslands með markvissum aðgerðum. Markaðssetning áfangastaðar er langhlaup, og nú þegar gera má ráð fyrir að ferðaþjónusta sé að taka við sér á ný þurfum við að vera tilbúin til þess að mæta þeirri miklu samkeppni sem gera má ráð fyrir frá öðrum áfangastöðum og breyta þessum uppsafnaða áhuga í heimsóknir til landsins. Við erum spennt fyrir því verkefni sem framundan er í samstarfi við íslenska ferðaþjónustu,“ sagði Pétur Þ. Óskarsson, framkvæmdastjóri Íslandsstofu, í kjölfar undirritunarinnar.

Áfangastaðir munu keppa um takmarkaðan fjölda ferðamanna

Formaður samtaka ferðaþjónustunnar, Bjarnheiður Hallsdóttir, sagði mjög mikilvægt og nauðsynlegt fyrir greinina og áfangastaðinn Ísland að fá þennan stuðning núna þegar allir áfangastaðir heims fara að keppast um að ná til sín takmörkuðum fjölda ferðamanna.

„Ég vil hrósa ríkisstjórninni fyrir að taka þetta skref núna. Þessi fjárfesting mun skila sér í hraðari viðspyrnu fyrir ferðaþjónustuna í landinu og efnahagslífið í heild,“ sagði Bjarnheiður.