Inga og Óli í Heiðmörk eru ræktendur ársins

Sölufélag garðyrkjumanna hefur undanfarin ár valið „ræktendur ársins“ innan sinna raða. Í ár hlutu hjónin Inga Sigríður Snorradóttir og Óli Finnsson á garðyrkjustöðinni Heiðmörk í Laugarási þennan heiður.

Óli og Inga hafa komið með nýjungar inn á markaðinn eins og eldpipar, sætar paprikur og snakkpaprikur. Þessar tegundir hafa slegið í gegn og njóta sífellt meiri vinsælda. Auk þess rækta þau steinselju og ýmsar tegundir af salati. Grænmetið frá Heiðmörk er reglulega í grænmetiskössum Matlands.

Fjölskyldan flutti árið 2021 úr Grafarvogi í Laugarás í Bláskógarbyggð eftir að hafa fest kaup á garðyrkjustöðinni Heiðmörk.

Heiðmerkursalatið og steinseljan eru sennilega þekktustu vörur garðyrkjustöðvarinnar. Auk Heiðmerkursalatsins er ræktaður fjöldinn allur af salattegundum sem koma ýmist í blöndum til neytenda eða einar og sér.

Allt sem vex í gróðurhúsunum á Heiðmörk er ræktað frá fræi og öllu grænmetinu er pakkað í neytendaumbúðir á staðnum. Gróðurhúsin á Heiðmörk eru 2500 fermetrar að stærð og er heilsárslýsing í þeim öllum.

Óli er menntaður Garðyrkjufræðingur úr Garðyrkjuskólanum en á einnig að baki feril sem kvikmyndagerðarmaður. Áhugi hans á garðyrkju kviknaði eftir útvarpsviðtal þar sem meðal annars kom fram hvað væri hægt að rækta fjölbreyttar og framandi plöntur í gróðurhúsum á okkar kalda landi, allt frá tómötum og gúrkum yfir í kaffiplöntur og bananatré.

/Heimild: www.islenskt.is / Myndir: SFG