Ferskt grænmeti frá Matlandi á Hellu

Matland býður í fyrsta sinn upp á afhendingu á grænmetiskössum á Hellu föstudaginn 24. febrúar næstkomandi. Kaupendur á Hellu og nágrenni geta framvegis nálgast sinn kassa á föstudögum í kjötbúð Villt & alið við Þingskála 4. Til þess að fá kassa þarf að skrá sig í vikulega, tveggja vikna eða mánaðarlega áskrift. Hægt er að segja upp áskriftinni eða gera hlé á henni með einföldum hætti á eigin svæði í vefverslun Matlands.

Hingað til hafa grænmetiskassarnir verið afhentir á höfuðborgarsvæðinu og sendir með vöruflutningum Samskipa út á landsbyggðina. Með því að afhenda kassana á einum stað hjá Villt & alið í stað þess að senda einn kassa til hvers kaupanda næst að lækka kostnað við flutning til muna. Hver kassi kostar 4.700 krónur en að auki bætist við 990 króna flutningskostnaður.  

Innlent og upprunamerkt

Grænmetiskassarnir frá Matlandi innihalda eingöngu innlent grænmeti og rótarávexti. Að jafnaði eru á bilinu 8-11 tegundir í hverjum kassa en úrvalið er breytilegt eftir því hvað er ferskast hverju sinni. Sölufélag garðyrkjumanna í Reykjavík sér um að fylla á kassana en hráefnið er að mestu frá bændum innan þeirra vébanda. Matland leggur metnað í að geta uppruna alls grænmetis sem er í boði hverju sinni. Í kössunum eru sumar vörurnar í umbúðum og aðrar ekki. Matland vill lágmarka umbúðanotkun en stundum er grænmetið innpakkað til þess að varðveita gæði.

Dæmi um innihald í grænmetiskassa #8:

• Rósasalat frá Hveratúni, 1 haus
• Paprikur frá Flúðajörfa, 2 stk.
• Tómatar frá Friðheimum, 6 stk, 500 g
• Klettasalat frá Hveratúni, 1 pk.
• Basilíka frá Ártanga, 1 pottur
• Kokteiltómatar frá Brún, 1 box
• Flúðasveppir frjá Flúðum – 250 g
• Grand salat frá Hveratúni, 1 stk.
• Agúrka frá Gufuhlíð, 1 stk.
• Gulrætur frá Flúðajörfa, 500 g

Vilt þú dreifa grænmeti fyrir Matland?

Matland mun á næstu vikum kynna nýja dreifingarstaði fyrir grænmetiskassana utan höfuðborgarsvæðisins. Áhugasamir dreifingaraðilar eru vinsamlegast beðnir að hafa samband í netfangið matland@matland.is.

Hér er hægt að skrá sig í áskrift að grænmetiskössum Matlands.