Gamaldags hveitikökur – bæði hversdags og til hátíðarbrigða

Gamaldags hveitikökur þekkja margir sem vestfirskar hveitikökur. Þær eru borðaðar bæði hversdags og til hátíðarbrigða en mörgum þykja þær ómissandi yfir jólin. Áður fyrr voru þær bakaðar eða steiktar á hellum eins og flatkökur, en í dag notast flestir við pönnu eða pönnukökupönnu og láta bakast/ristast á þurri pönnunni.

Þessar hveitikökur gerði amma alltaf reglulega. Það hefur tíðkast hjá minni fjölskyldu að gera kökurnar fyrir veislur og þegar eitthvað stóð til.

Ávallt var smurt með reyktum laxi, silungi eða hangikjöti.

Hveitikökurnar hafa alltaf verið í miklu uppáhaldi hjá mér og ég hef komið mörgum á bragðið síðan. Ég mæli með að gera stóra uppskrift og setja í frost, því það er æðislegt að geta kippt upp einni og einni til að gæða sér á þegar löngunin grípur mann.

Hráefni

• 500 g hveiti
• 60 g mjúkt smjör
• 50 g sykur
• 4 tsk lyftiduft
• ½ tsk matarsódi
• Smá salt
• Um það bil 4 dl mjólk

Aðferð

Hnoðið vel saman í höndunum eða notið hnoðarann í hrærivélinni þar til deigið verður vel samblandað, það er smá klessulegt.

Skiptið í nokkrar jafnar kúlur, ættuð að ná 7 -10 kúlum.

Fletjið út í hringlóttar kökur og notið hveiti til að auðvelda verkið. Hnoðið í þá stærð sem pönnukökupannan er. Steikið svo á meðalheitri þurri pönnunni þar til byrjar að taka smá lit undir og snúið svo við. Þetta tekur ekki langan tíma.

Berið svo fram með því áleggi sem ykkur lystir. Ég mæli með hangikjöti og reyktum laxi eða silungi. Annars er þetta gott með öllu áleggi.