Heitur brauðréttur sem bragð er af

Heitir brauðréttir hafa fylgt okkur í gegnum árin í afmælum, fermingar- og brúðkaupsveislum, ættarmótum og við fleiri tilefni. Eitthvað fyrir fullorðna fólkið að gæða sér á, svona á milli sneiða af dísætum marengs-, súkkulaði- og rjómatertum sem eru alltaf í svo brjálæðislega miklu magni í kökuveislum!

Ekkert að því, ég elska kökur og allir sem þekkja mig vita það.

En það jafnast ekkert á við góðan brauðrétt – sérstaklega fyrir okkur sem viljum aðeins meira en bara sykur til að leika við bragðlaukana.

Þennan rétt er auðvelt að gera þegar tíminn er naumur – tekur enga stund.

Hráefni

• 1 heilt niðurskorið franskbrauð (taka frá 5-6 sneiðar). Léttrista í ofni í nokkrar mínútur, þar til sneiðarnar eru næstum ristaðar.
• Um það bil 200 g pepperoni
• ½ pakki skinka
• 2 grænar paprikur
• 1 krukka grænn aspas, skorinn í bita, safi tekinn frá
• 1 dós Dole-ananas í sneiðum, skorinn smátt. Takið frá 2 msk af ananassafanum
• 1 líter rjómi
• ½ dolla papriku-smurostur
• 2/3 dolla Camembert-smurostur
• 1 dolla 18% sýrður rjómi
• 1 Dalahringur, hvítmygluostur
• 1 pakki Ritzkex
• 1 tsk Aromat
• 2 msk þurrkaður graslaukur
• 1 tsk þurrkað dill
• Salt og pipar eftir smekk

Aðferð

Skerið grænmetið og kjötmetið niður nokkuð smátt og mýkið á pönnu upp úr smá olíu eða smjöri. Á meðan þá léttristið brauðið, (nema um 5-6 sneiðar sem þið geymið áfram).

Bætið svo safanum af aspasinum og ananasinum út á pönnuna ásamt kryddi, smurosti og rjóma. Leyfið að malla þar til blandast vel.

Spreyið eða berið á tvö eldföst mót með olíu.

Takið ristaða brauðið ásamt óristaða og rífið niður í stóra skál og hellið blöndunni yfir og blandið vel saman.

Skiptið jafnt á milli tveggja forma. Skerið Dalahringsostinn í bita og dreifið jafnt yfir.

Myljið Ritz-kexið yfir allt saman og bakið í ofni við 170°C í um það bil 20-30 mínútur þar til rétturinn er orðinn fallegur að lit.

Berið fram um leið og rétturinn er klár.