Klassískt rauðkál

Það er einfalt og fljótlegt að útbúa eigið rauðkál. Nanna Rögnvaldardóttir á góða uppskrift sem birtist í bókinni Jólahefðir frá árinu 2005.

Hráefni

1 rauðkálshaus (um 800 g)
1 grænt epli (má sleppa)
1 rauðlaukur
2 msk olía
100 g rifsberjahlaup
3 msk rauðvínsedik
2-3 msk sykur (eftir smekk)
pipar og salt

Aðferð

Rauðkálið er skorið í ræmur og rauðlaukurinn saxaður smátt.

Eplið flysjað, kjarnhreinsað og skorið í bita. Olían hituð í potti og rauðlaukurinn látinn krauma við vægan hita í smá stund.

Rauðkálinu og eplunum bætt út í. Síðan rifberjahlaupi og ediki, ásamt 2-3 msk af sykri og dálitlu af pipar og salti.

Hrærið vel í pottinum og látið malla í 25-30 mínútur eða þar til rauðkálið er orðið meyrt.

Smakkað og bragðbætt með sykri, pipar og salti eftir smekk.

/Uppskrift í bókinni Jólahefðir eftir Nönnu Rögnvaldardóttur.